The untouchables

على اد ما ساعات بنستغرب وبنحتار أما الشامي يتلم على المغربي

على اد ما ساعات بردو بيكون علاج الشامي وجود المغربي ده والعكس صحيح

 

انا ايمان نافع وانتم دلوقتي بتسمعوني على قناة مايكرو موفي

 

فيلمنا النهاردة هيكون عن قصة حقيقية

وهو فيلم لذيذ جدا الحقيقة

 

تخيل كدا معايا اما يكون فيلم رسالته حلوة ومليان مشاعر جميلة وانت بتتفرج تبقى عارف ان دول ناس حقيقية ومروا بنفس التجارب

 

حاجة لذيذة مش كده؟

 

 

اتحمستم 

يلا بينا

 

فيلمنا النهاردة بيبدأ باتنين راكبين عربية غالية وفخمة وعمالين يجروا في الشوارع

وبتبتدي الشرطة تطاردهم

 

وانت بتبقى قاعد مش فاهم هما دول مالهم

حرامية ولا عصابة ولا في ايه بالظبط

 

وبنلاقي اللي بيسوق شاب وبيكون بيضحك بشكل هستيري

أما اللي جنبه بيكون اكبر منه في السن  وباين عليه الهدوء التام

 

وبيراهن الشاب اللي بيسوق الراجل اللي جنبه على فلوس وده طبعا في حالة لو قدر انه يهرب من الشرطة اللي بتجري وراهم

 

وبعدين بتحاصرهم الشرطة وبيتريق الراجل الكبير عليه

بس الشاب الاسمر بيراهنه انه هيقدر يكسب تعاطفهم ويخليهم هما اللي عايزين يوصلوهم لأن مكان عايزين يوصلوا ليه

 

وفعلا بينزل الشاب الاسمر من العربية

وبيبتدي يقول للشرطة انه كان بيجري بسرعة لان الراجل اللي جنبه مريض وتعبان ومحتاج انه يتنقل للمستشفى في اسرع وقت

 

بس الظابط بيطلب من الراجل الكبير انه ينزل فبيعرفه الشاب انه مشلول ومش بيتحرك 

 

وبيبدأ الراجل الكبير يرتعش ويرجع

فالشرطة بتصدق الشاب وبتسمح له انه يرجع العربية ويسوق بسرعة علشان ينقذ الحالة اللي معاه

 

وفعلا بيركب الشاب وبيبقى بيضحك وبيبان على الراجل الكبير انه كان بيمثل وبيلاقوا الظابط جيه وقال للشاب انهم هيمشوا وراهم ويأمنوهم لحد ما يوصلوا للمستشفى

 

 

وهنا الشاب هيسوق وهيشغل موسيقى عاليه وهيفرح انه كسب الرهان التاني وخلى الشرطة تصدقه

 

وبيوصله للمستشفى والشرطة بتطلب انهم يجيبوا كرسي علشان ياخدوا الراجل الكبير 

 

وبعدين بيطمن الظابط الشاب وبيمشي

 

وهنا الشاب بيضحك وبياخد الراجل الكبير وبيمشي على مكان الراجل الكبير ميعرفوش

 

 

وبيبدأ الفيلم يرجع لورا علشان يحكي لنا عن الشاب والراجل ويعرفنا هما ايه اللي مخليهم مع بعض وايه اللي بيعملوه ده

 

 

وبنرجع لورا وبنلاقي ان الشاب ده اسمه دريس 

وشاب روش ومؤمن بمقولة البيت اللي مفيهوش صايع حقه ضايع

 

دريس بيشرب سجاير ومخدرات

بيحب الموسيقى والرقص

 

وبيغيب عن البيت بالايام وبيبات بره عادي جدا

 

وبيبقى محتاج لامضا علشان يقدر بيه ياخد فلوس من الدولة

تساعده على المعيشة

وعلشان ياخد الامضا دي لازم يقدم مساعدة

 

 

وبيروح دريس ساعتها للراجل اللي كان معاه ودي بتكون اول معرفته بيه 

الراجل ده اسمه فيليب غني وعنده بنت واحده

عنده شلل كلي وعايش بالعلاج الطبيعي والادوية ومحتاج لحد يرافقه يشيله ويحطه ويحركه ويحميه

وبيكون هو نفس الراجل اللي المفروض يمضي الورقة اللي محتاجها دريس

 

وبيروح له دريس في يوم بيكون فيه فيليب واللي شغالين معاه بيعملوا مقابلة لكذا حد علشان يختاروا منه حد مناسب انه يرافق فيليب ويكون متفهم حالته

 

وفعلا بيتقدم كذا حد للشغل ده بس بيبان على فيليب انه مش مؤمن بولا واحد فيهم وحاسسهم كلهم جايين يا معندهمش خبرة يا معاهم شهادات وبس يا علشان محتاجين اي شغل وخلاص

 

وبيفضل كل ده دريس مستني يدخل ياخد الامضا 

بس بتطول اوي المقابلات فبيتعصب وبيقرر انه يدخل

 

وبيبدأ انه يتكلم بطريقته اللي فيها هزار وسخرية

وبتلفت طريقته نظر فيليب وبيحبها جدا وبيطلب منه انه يجي له تاني يوم عشان ياخد الامضا بتاعته

 

ودريس بيمشي بس بيكون لفت نظره وجود رف عليه بيض دهبي فبياخد واحدة وبيمشي يروح على بيته

اللي بيبان اد ايه مليان عيال وكبار وصغيرين ومفيهوش اي خصوصية ولا فيه راحة كله زعيق ومشاكل

 

وبيدخل دريس ياخد حمام وبيقعد في المطبخ يشرب سجارة

وبيتفتح باب الشقة وبتدخل عمته اللي بتشتغل وبتكون راجعة متأخر وتعبانة وبتلاقيه قاعد

 

فبيحاول دريس انه يفتح معاها كلام وبيديها البيضة اللي اخدها من عند فيليب كهدية

 

بس بيلاقيها متنرفزة وبتعاتبه على غيابه المتكرر وانه بيرجع من غير فلوس ومش بيساعدها

اصل عمته عندها عيال كتير وهي اللي مربية دريس فدول يعتبره اهله واسرته

 

وبتتهمه بالاهمال وبتطرده

وبيمشي دريس في الشوارع

وتاني يوم بيروح لفيليب

اللي بيقوله انه مش هيدي له الامضا الا لو اشتغل شهر معاه

وعلشان يستفزه بيقوله انه مش هيعمر معاه اكتر من اسبوعين

 

بس دريس بيكون ملهوش مكان فبيقول عليا وعلى اعدائي وبيجيب شنطته وبيجي

 

وبيبدأ يتعلم كل  حاجة خاصة برعاية فيليب من اكل وشرب ولبس وحما

 

وبيشتكي وبيزعق ساعات بس ساعات تانية بيصعب عليه فيليب وبيخدمه بحب

 

الغريبة ان فيليب كان متقبله ومتقبل غلطاته وكان دريس على قلب فيليب ذي العسل

وكان دريس مع فيليب في كل حتة

كان بيروح معاه معارض رسم وكان بيتريق على الرسومات ويستغرب من الفلوس اللي بيدفعها فيليب في رسومات بالنسبة له مجرد شخبطة

 

وكان فيليب بياخده معاه للاوبرا وكان دريس بيتريق عليها

 

وبيجي الموقف اللي قرب بين دريس وفيليب اكتر واكتر وهو اما تعب فيليب وقام دريس وعمله كمادات واخده ومشاه في الشارع ودخلوا مطعم وكلوا وشربوا

 

وهنا حكى فيليب لدريس قصته وقاله انه فقد مراته وان ده بالنسبة له الاعاقة الحقيقية 

وكمان قاله ان بنته دي مش بنته ده هما متبنيينها 

وبيعرفوا فيليب انه عارف انه هو اللي اخد البيضة من عنده وبيطلب منه يرجعها لان كل بيضة كانت عنده اداها لمراته في يوم ما وليها معاه زكريات

وبيعرفه ان خلاص الشهر خلص وانه ممكن يدي له الامضا اللي هو عايزها

 

بس طبعا دريس بيفضل معاه

وبيضحكوا وبيهزروا وبيلاقي فيليب في دريس الصديق اللي عايز يشاركه كل حاجة وبيطمن في صحبته

 

 

وبيبتدي دريس يتأثر بالرسم وبيرسم لوحة وبيوريها لفيليب اللي بيكون فخور بيه وبيقرر انه يبيعها له بسعر عالي

 

ودريس بيبقى شايف ان بنت فيليب بالتبني بتعمل تصرفات طايشة وقليلة الذوق فبيطلب منه انه يكون حازم معاها وبيبقى دريس رفيق وصاحب وناصح وعيون كمان لفيليب

 

وبيبدأ دريس يخرج فيليب ويخليه يجرب حاجات جديدة 

 

وبيعرف دريس ان فيليب

بيحب واحدة بس مش حابب يواجهها او يشوفها بسبب انه مشلول

فبيشجعه دريس انه يكلمها ويحاول يقابلها

وانه يبطل يكتفي بالكتابة كطريقة تواصل بينهم

 

 

وفعلا فيليب بيكلمها وبيحددوا معاد

وبيفضل فيليب يجهز له بس بيطلب انه يروح لوحده مع واحدة من اللي بيشتغلوا معاه وبيروح

ودريس كمان بيقرر انه يروح لعمته مكان شغلها ويشوفها حتى من بعيد وبيستناها

بس بيجي له تليفون من فيليب اللي بيكون محبط جدا وقرر انه يمشي وميقابلش الست اللي بيحبها وبيطلب من دريس انه يجي ويخرجوا مع بعض

 

 

وفعلا بيخرج دريس مع فيليب وبيركبوا فيليب طيارته الخاصة 

وبيرجعوا للبيت

 

وبيلاقي دريس واحد من اولاد عمته واللي بيكون بيعمل مشاكل جاي له وعايزه يرجع معاه للبيت

 

 

ومبيبقاش دريس عارف يعمل ايه

 

بس فيليب بيشوفه في الحالة دي بيتكلم معاه

وبيقوله انه مش هيقضي عمره كله معاه وانه لازم يجي عليه يوم ويمشي

وبيطلب منه انه يروح مع ابن عمته

 

 

 

وفعلا بيلم دريس حاجته وبتبقى لحظة صعبة على فيليب ودريس

 

وبيمشي دريس وبيرجع لعمته ولاولادها ولحياته تاني

 

وفيليب بيدخل في حاله اكتئاب وبيرفض مساعدة اي حد من اللي جم بعد دريس

 

وبتلاقي واحدة من الموظفين عند فيليب الوضع بيزيد سوء فبتقرر انها تكلم دريس يجي ويشوف حل للمشكلة دي

 

وبيجي فعلا دريس وبيلاقي فيليب دقنه طويلة وقاعد لوحده

 

وبياخده وبيحلق له ويهزر معاه

ويجري بيه في الشارع

وبنرجع تاني لاول لقطات في الفيلم

وتحديدا للقطة اللي بيمشي فيها فيليب ودريس من ادام المستشفى بعد ما الشرطة بتمشي 

 

وبياخده دريس على مكان جديد

وبيلبسه وبيشيكه وبياخده على مطعم وبيقوله انه هيمشي وانه دلوقتي في معاد غرامي وبيدي له البيضة اللي كان اخدها منه في الاول وبيمشي

 

وبيبقى مستغرب جدا فيليب من تصرف دريس

 

بس بيفضل مستني وبيلاقي الست اللي كان بيحبها وبيكتب لها جت وقعدت معاه

 

وبيخلص الفيلم على انه بيعرفنا ان فيليب هيتجوزها وهيخلف منها

وكمان دريس هيتجوز ويخلف ويعمل أسرة 

 

وانهم لحد دلوقتي اصحاب وقريبين من بعض

 

وبيجيب الفيلم صورة دريس وفيليب الحقيقين

 

شوفتم بقى ازاي ممكن الشامي يكمل ويسعد المغربي

 

قولوا لي رأيكم في الفيلم في الكومنتات لو عجبكم

وقولولي حابين الخص لكم افلام ايه

 

سلام